Мемлекет әлеуметтік міндеттемелерін толық орындап отыр – Мәулен Әшімбаев

АСТАНА. KAZINFORM – Мәслихат депутаттары бюджеттерді бекітіп қана қоймай, олардың орындалуын да жіті қадағалауы қажет. Бұл туралы бүгін елордада Сенат төрағасы Мәулен Әшімбаев мәлім етті.

- Қазіргі таңда Қазақстан әлеуметтік-экономикалық реформалардың жаңа кезеңіне аяқ басты. Осы орайда Президентіміз қолға алған реформалардың мәніне қысқаша тоқталып кетейін. Реформалардың негізгі өзегі – кешенді дамуды қамтамасыз ету. Ал, экономикадағы жаңа кезеңнің мақсаты – әртараптандыру, технологиялық негіз, ашықтық пен әділеттілік арқылы сапалы өсімге қол жеткізу. Бізде әуелден мұнайгаз және тау-кен саласы жақсы дамығанын білесіздер.

Дегенмен, қазіргі таңда Мемлекет басшысы экономиканың өзге салаларының үлесін арттыруды міндет етіп жүктеп отыр. Былтыр еліміздің ішкі жалпы өнімі 288 млрд долларға жетті. Осы ретте өңдеу саласының үлесі өндіруші сектормен теңескенін айрықша атап өткен жөн. Бұл барынша әртарапты экономикаға нақты қадам жасалып жатқанын көрсетеді. Бұл жұмысты әрі қарай жалғастыру қажет, - деді М. Әшімбаев Сенат жанындағы мәслихаттармен өзара іс-қимыл жөніндегі кеңестің кеңейтілген отырысында.

Оның айтуынша, қойылған мақсатқа жету үшін машина жасау, мұнайгаз химиясы, агроөнеркәсіп кешені, цифрлық және «жасыл» технологиялардың дамуы жаңа деңгейге көтерілуге тиіс. Сонымен бірге, өңдеу секторына сапалы инвестиция тарта отырып, өнім өндіру мүмкіндігі жоғары жұмыс орындарын құру маңызды. Бұл ретте орталық органдар мен өңірлердің арасындағы үйлесімді жұмысты қамтамасыз ету қажет. Осы жұмыстар аясында мәслихаттар қолайлы инвестициялық жағдай қалыптастыруға және кедергілерді жойып, экономикалық жобаларға көмек көрсетуге белсенді қатысуы керек.

- Президенттік реформалардың келесі бір бағыты – әлеуметтік саланы дамытуға да мәслихат депутаттарын жұмылдыру аса маңызды. Мемлекет басшысы атап өткендей, бюджет қаражаты азаматтардың өмір сүру сапасына тікелей әсер ететін мақсаттарға бағытталуы керек. Бюджеттегі қиындықтарға қарамастан, мемлекет өзінің барлық әлеуметтік міндеттемелерін толық орындап отыр. Жыл сайын зейнетақы мен жәрдемақыға индексация жасалады. Шәкіртақы мен бюджеттік ұйым қызметкерлерінің жалақысы да өсіп келеді. Әлеуметтік инфрақұрылымды дамыту бағыты бойынша Мемлекет басшысының тапсырмасына сәйкес «Жайлы мектеп» ұлттық жобасы іске асырылуда. Биыл 200-ге жуық мектеп ашылады. Үш жылдың ішінде 1300 мектеп жаңғыртылады. Ауылдық жерлердегі денсаулық сақтау жөніндегі ұлттық жоспар аясында соңғы жылдары 263 медициналық нысан бой көтерді. Биыл жыл соңына дейін осындай тағы 188 нысан пайдалануға беріледі, - деді Сенат спикері.

Оның сөзіне қарағанда, бұл ретте жол, балабақша, мектеп, тұрғын үй-коммуналдық шаруашылық және әлеуметтік инфрақұрылым құрылысы мен оларды жөндеу жұмыстарына мониторинг жүргізудің мәні зор. Мәслихат депутаттары бюджеттерді бекітіп қана қоймай, олардың орындалуын да жіті қадағалауы қажет.

Бұдан бұрын хабарланғандай, бүгін елордада Сенат жанындағы мәслихаттармен өзара іс-қимыл жөніндегі кеңестің кеңейтілген отырысы өтіп жатыр.