Егер солардың қатарында болсаңыз, айта кетейін, ол кәсіпқой бокста 66 жекпе-жек өткізіп, 58-інде жеңіске жеткен азулы спортшы. Тіпті бүгін осы мықты WBO тұжырымдамасы бойынша әлем чемпионы атағына таласады. Лас-Вегастың аренасында «Алтын белдік» иегері Джесси Варгаспен күш сынасады. Айта берсең атағынан ат үркиді, әрине. Бірақ осы филипиндік жігітті бір кездері қазақтың қара баласы ұрып құлатқанын білмейтін шығарсыздар.
Қазір елімізде кәсіпқой бокстан нәпақа туып жүрген жігіттер көп. Әртүрлі промоутерлік компаниялар ашылып, былғары қолғап шеберлерінің барлық жағдайлары жасалуда.
Ал 90-шы жылдардың аяғында кәсіпқой бокспен шұғылданатындар саусақпен санарлық еді. Солардың бірі Серікжан Ешмағанбетов болатын.
«Ол кезде заман сондай қиын болды. Өздеріңіз білесіздер, 90-шы жылдары ақша жағынан жағдай қиын еді. Зал табу деген... Қазіргі уақытта промоушен дейді. Ол кезде спонсорлар көп болмайтын. Болса, бір-екі ай көмегін беріп, кейін қиналған соң онша көмектеспейтін. Өзіміздегі ниет бокстасып, Қазақстанның атын шығару болған», - дейді ардагер боксшы Серікжан Ешмағамбетов.
Кәсіпқой бокста 37 кездесу өткізіп, соның 27-сінде жеңіске жеткен Серікжан 12 жекпе-жекте қарсыластарын нокаутқа жіберген. Оның спорттық ғұмырындағы айтулы жекпе-жектерінің бірі 2003 жылы Мэнни Пакьяомен өтті. Манила қаласында қарсыласын 4-ші раунтта сұлатып салған Серікжан 13 жыл бұрынғы кездесуді былайша еске алады.
«Салмақ өлшеу рәсімінде сіз Пакьяомен қалай төбелесесіз деген кезде, біз енді ағылшынша сөздеріміз көп емес аздау. Содан соң «артқа қайтпаймыз, Мэнни Пакьяоңызды үшінші раундта құлатамыз, Алла бұйырса» дедім. Енді үшінші болмаса да, төртінші раундта бір құлатқанбыз...».
Кәсіпқой рингтегі соңғы жекпе-жегін 2008 жылы 37 жасында өткізген Ешмағамбетов былғары қолғабын шегеге ілген соң, бапкерлікке бет бұрып, қазіргі таңда шәкірт тәрбиелеп жүр. Ал сол Серікжан кездесуінен кейін жұлдызы жанған Мэнни Пакьяоны қазір күллі әлем таниды. Филипиндік боксшы бүгін WBO тұжырымдамасы бойынша әлем чемпионы атағы үшін Лас Вегаста Америкалық Джесси Варгаспен қолғап түйістіреді. Бұл жекпе-жекті сіздер жексенбі күні таңғы 9:00 де Хабар арнасының тікелей эфирінен тамашалай аласыздар.