Қазақстандық, әлемнің 213-ракеткасы Михаил Кукушкин Бергамо (Италия) челленджер турнирінің іріктеу сайысын сәтті өткізді, деп хабарлайды Kazinform.
Қазақстандық теннисші алдымен дүниежүзілік рейтингте 589-орында тұрған италиялық Федерико Арнабольдиді 6:3, 6:2 есебімен жолдан тайдырды.
М.Кукушкиннің іріктеу сайыстарының финалындағы кездесуі әлдеқайда тартысты өрбіп, үш сетке созылды. Қазақстандық спортшы рейтингте 305-сатыдағы македониялық Калин Ивановскиді 3:6, 7:6 (7:2), 6:4 есебімен тізе бүктірді.
Екі сағат жарымға созылған бәсеке барысында М.Кукушкин 2 эйс жасап, 7 брейк-пойнттың үшеуін пайдаланды. К.Ивановски 20 эйспен бірге 3 брейкке (10 брейк-пойнт) қол жеткізді.
Михаил Кукушкиннің негізгі додадағы қарсыласы кейін анықталады.
Бергамо жарысының жүлде қоры 73 мың еуроға бағаланған. Дода 5 қарашада аяқталады.
Еске сала кетейік, бұдан бұрын WTA қорытынды турнирінде Елена Рыбакинаның алғашқы матчында жеңіліп қалғанын жазған едік.
Сондай-ақ Қазақстан жасөспірімдер құрамасының Дэвис кубогіндегі қарсыластары анықталды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).