АСТАНА. KAZINFORM — Қазақстандық теннисші, әлемнің 281-ракеткасы Михаил Кукушкин Уси (Қытай) ATP Challenger 100 турнирінің 1/8 айналымына шықты.
Қазақстандық спортшы бастапқы кездесуін рейтингіде 798-орындағы қытайлық, 20 жастағы Тяньхуэй Чжанмен өткізді.
Бірінші партияда 38 жастағы Кукушкин тай-брейкте табандылық танытты – 7:6 (7:4). Екінші сет сәл оңайлау тиді – 6:3.
Бір сағат 35 минутқа созылған бәсекеде М.Кукушкин 1 эйспен бірге 6 брейк-пойнттың төртеуінде мүлт кеткен жоқ. Чжан 1 эйс, 2 брейкпен шектелді.
Михаил Кукушкиннің келесі айналымдағы қарсыласы кейін белгілі болады.
Бүгін жаңартылған ATP рейтингісінде М.Кукушкин 282-ден 281-ге ауысты.
Қазақстанның бірінші ракеткасы Александр Бублик 11-орында қалса, Александр Шевченко 82-ден 85-ке төмендеді.
Тимофей Скатов 198-ден 188-ге, Бейбіт Жұқаев 300-ден 297-ге жоғарылады.
Еске сала кетейік, бұдан бұрын Елена Рыбакинаның WTA чемпиондық кестесінде көш бастап келе жатқанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).