АСТАНА. KAZINFORM — Спорттық гимнастикадан Қазақстан ұлттық құрамасының бапкерлер штабы Джакартада (Индонезия) өтетін әлем чемпионатында ел намысын қорғайтын спортшылардың тізімін жариялады.
Әртүрлі бағдарламада жүлде үшін алты гимнаст бақ сынайды. Атап айтқанда Нариман Кұрбанов ат снарядындағы, Милад Карими кермедегі, еркін, Дмитрий Патанин еркін, қоссырық пен шығыршықтағы жаттығулар бойынша сайысқа түседі.
Сондай-ақ Ильяс Әзізов еркін, қоссырық және кермедегі, Диас Тойшыбек ат снаряды, қоссырық және кермедегі, Зейнолла Ыдырысов ат снарядындағы жаттығулар жарысында ел намысын қорғайды.
Айта кетейік, әлем чемпионаты 19-25 қазан аралығында өтеді. Өткен әлем біріншілігінде Милад Карими еркін жаттығуларда қола медаль жеңіп алған еді.
Еске салсақ, бұдан бұрын Оңтүстік Кореяның Чечхон қаласында өтіп жатқан спорттық гимнастикадан жасөспірімдер арасында Азия чемпионатында Нұртаң Ыдырысов алтын медаль алды.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.