Мыңдаған марокколық әйел Испаниядағы маусымдық жұмысқа тартылады

АСТАНА. KAZINFORM — 2026 жылы Испанияның Уэльва провинциясына құлпынай жинауға Мароккодан мыңдаған маусымдық жұмысшы барады, деп хабарлайды АЗЕРТАДЖ.

Агенттіктің Akhbarona басылымына сілтеме жасап хабарлауынша, бұл процесс Марокко мен Испания арасындағы циклдік миграция саласындағы ынтымақтастық келісімдерінің бір бөлігі саналады.

Келісімдердің мақсаты — испан фермерлерін білікті жұмыс күшімен қамтамасыз ету және Марокконың Ұлттық жұмыспен қамту және кәсіби даярлау агенттігі (ANAPEC) арқылы тексерілетін, бақылауда болатын мыңдаған мароккалық әйелге еңбек етуге заңды мүмкіндік беру.

Бұл науқан Рабат пен Мадрид арасындағы экономикалық және әлеуметтік ынтымақтастықтың негізгі тіректерінің бірі болып есептеледі: бір жағынан, Уэльва өңірінің жергілікті экономикасын қолдауға, екінші жағынан, Мароккодан келген әйел жұмысшылардың қаржылық кірісін арттыруға ықпал етеді.

Осыған дейін Испания министрлер кеңесі 27 қаңтарда ел аумағында заңсыз жүрген шетел азаматтарына 2026 жылғы сәуір-маусым айлары аралығында жұмыс істеу құқығымен уақытша тұруға рұқсат алуға мүмкіндік беретін «төтенше заң-декретті» мақұлдағаны мәлім болды. Тәуелсіз дереккөздер Испанияда заңсыз жүрген мигранттар саны 1 миллионға жуық екенін айтады.