Минералды тыңайтқыштар өндіретін әлемдік компания ОҚО-да бірлескен жобаларды ашуға ниетті
Екіжақты кездесу барысында тараптар аталған компания мен Оңтүстік Қазақстан облысының арасындағы өзара тиімді жобаларды жүзеге асыруды сөз етті.
«Үш миллионға жуық тұрғыны бар Оңтүстік аграрлық аймақ саналады. Облыста соңғы жылдары өнеркәсіп пен ауыл шаруашылығы саласы жылдан-жылға қарқынды дамып келеді. Бұдан бөлек, тау-кен саласын игеруде де тәжірибеміз мол. Сондықтан бүгінгі кездесудің маңыздылығы ерекше», - деді Жансейіт Қансейітұлы.
ОҚО әкімдігінен мәлім еткендей, «Акрон» компаниясы президентінің кеңесшісі Иван Антонов Қазақстан мен Ресей елі арасындағы достық және экономикалық қарым-қатынастың жылдан-жылға нығайып келе жатқанын атап өтті. Ол сондай-ақ «Акрон» компаниясының құрамына ресейлік ірі тау-кен байыту комбинаттары кіретіндігін мәлімдеді. 1967 жылы құрылған кәсіпорын бүгінде Ресейдің бірқатар облыстарында минералды азот және фосфат тыңайтқыштарын өндірумен және күріш өсірумен айналысады.
«Біздің компания минералды тыңайтқыштар әзірлейтін әлемдегі үздік кәсіпорындар қатарына жатады. Қазіргі таңда кен өндіріп, түрлі химиялық тыңайтқыштар шығарумен айналысатын компанияда 12 мыңға жуық азамат еңбек етеді. Алдағы уақытта осы бағыттарда бірлесіп жұмыс істеуге ниеттіміз. Оңтүстік Қазақстан облысына жасаған сапарымыз сәтті аяқталып, келесі кездескенде ауқымды жобаларды іске асыруға келісім жасалатынына сенімдімін», - деді Иван Антонов.
Ресейлік компания өкілдері іссапар барысында облыстың индустриялды аймағындағы кәсіпорындардың жұмысымен танысатын болады.
Айта кетейік, Ресей Қазақстанның сауда саласындағы дәстүрлі ірі серіктесі болып саналады. Өзара тауар айналымның орташа жылдық көлемі шамамен 21 миллиард долларды құрайды. Бүгінде Қазақстанда ресейлік капиталдың қатысы бар 6 мыңнан астам кәсіпорын жұмыс істейді.