АСТАНА. ҚазАқпарат - Австрияның Крайшберг тау шаңғысы шипажайында фристайлдан өтіп жатқан әлем чемпионатында қазақстандық спортшы қыз Юлия Галышева қола жүлдеге қол жеткізді.
Чемпионат.ком сайтынан алынған мәліметке қарағанда, жұптық могулден американдық Ханна Кирни әлем чемпионы атанса, канадалық Жюстин Дюфур-Лапойнт күміс жүлден иеленді. Юлия үшінші орын үшін бәсекеде атышулы апалы-сіңлілердің бірі Хлоя Дюфур-Лапойнттен басым түсті.
Бұған дейін осы әлем біріншілігінде могулден өткен жарыста Юлия бесінші орынды иеленді.
Еске сала кетейік, 2014 жылғы 13 желтоқсанда Финляндияда өткен Әлем кубогі кезеңінде жұптық могулден Ю.Галышева жартылай финалда Ханна Кирниді, финалда дәл осы Хлояны ұтып, жеңімпаз атанған болатын. Өткен жылғы Сочи Олимпиадасында төрешілердің төмен баға қоюынан жүлделі орынға іліге алмаған қазақстандық могулші шеберлігін осылайша дәлелдеп келеді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).