АСТАНА. ҚазАқпарат – Мысырлық Мохамед Салах ағылшындық «Ливерпуль» тарихында ең сұрмерген ойыншы атанды, деп хабарлайды ҚазАқпарат тілшісі.
Сhampionat.com сайтынан алынған мәліметке қарағанда, М.Салах Англия Премьер-лигасының 26-турында «Манчестер Юнайтед» клубымен матчта қос голдың авторы атанды.
Осылайша, мысырлық шабуылшы Англия чемпионатындағы 128-інші және 129-голын соғып, атақты футболшы Робби Фаулерді басып озды.
Аталмыш ойында Салахтан басқа Коди Гакпо мен Дарвин Нуньес екі-екіден гол соқса, Роберто Фирмино матч нүктесін қойды. Сөйтіп, германиялық маман Юрген Клоптың шәкірттері 7:0 есебімен жеңіске жетті.
Англия біріншілігінде лондондық «Арсенал» 63 ұпаймен көш бастаса, «Манчестер Сити» (58 ұпай) екінші, «Манчестер Юнайтед» (49) үшінші орында. «Ливерпуль» 42 ұпай жинап, бесінші сатыға көтерілді.
Еске сала кетейік, бұдан бұрын Карим Бенземаның Лионель Мессидің рекордын қайталағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).