Моңғолияда қой қырқу бойынша ұлттық «Алтын қайшы-2025» байқауы өтті
АСТАНА. KAZINFORM — Тув аймағының Зуунмод сомонында Моңғолия Президенті Ухнаагийн Хүрэлсүхтің қамқорлығымен алғашқы ұлттық «Алтын қайшы — 2025» қой қырқу байқауы өтті.
Байқаудың мақсаты — мал шаруашылығынан алынатын шикізатты қайта өңдеуді арттыруға, қой жүнінің құндылығын көтеруге, оны қалдықсыз пайдалануға және жүннен жасалатын дайын өнімдерді қолдауға бағытталған «Ақ алтын» ұлттық қозғалысын жандандыру. «Алтын қайшы — 2025» ұлттық байқауы қой қырқудың тиімді әдістері мен технологияларын енгізуге, малшылардың жұмысын жеңілдетуге және бұл кәсіпке жастарды тартуға мүмкіндік береді.
Байқау үш аталым бойынша өтті: дәстүрлі қайшымен қырқу, электронды қайшымен қырқу және кәсіби қырқу. Қазылар алқасының құрамына Австралиядан келген маман, Жаңа Зеландиядан жеті маман, сондай-ақ малшылар, ғалымдар мен зерттеушілер кірді.
«Алтын қайшы» қой қырқу бойынша халықаралық байқауы алғаш рет 1961 жылы Жаңа Зеландияда ұйымдастырылған болатын. Бүгінде әлемнің 15 елінде бұл байқау жергілікті ерекшеліктерге сай тұрақты түрде өткізіледі.
Байқау аясында жүн мен кашемирден жасалған бұйымдардың көрмесі, сән көрсетілімі, жүн өңдеу әдістері, садақ ату және шопандар арасындағы ән байқауы да өтті.
18 аймақтан келген 19 бен 70 жас аралығындағы 100-ден астам шопан «Алтын қайшы — 2025» байқауына қатысты. Әр аталым бойынша жеңімпаздар Президент кубогымен марапатталды, ал электронды қайшымен қырқу санатындағы жеңімпаздар 2026 жылы өтетін қой қырқудан әлем чемпионатына қатысу құқығын жеңіп алды.
Айта кетелік Моңғолияда қой қырқу бойынша әлемдік сайыс өтетіні туралы жазған едік.