НЬЮ-ЙОРК. ҚазАқпарат – БҰҰ-ға мүше 100-ден астам елдің өкілдері мұхиттарды қорғау туралы тарихи келісім бекітті, деп хабарлайды ҚазАқпарат Euronews-ке сілтеме жасап.
Заңды міндеттеме жүктейтін құжат жүзінде осы онжылдықтың аяғына дейін әлемдегі мұхиттардың 30%-ы қорғалатын аудандарға айналуы керектігі қарастырылады.
Экономикалық аймақтар аумағынан тыс ашық мұхит әлемдегі мұхиттардың үштен екі бөлігін алып жатыр. Ол балық аулауды қолдау, экожүйелерді қамтамасыз ету және климаттық дағдарыс салдарын жұмсартуда маңызды рөл атқарады. Бірақ, қазір бұл кеңістіктің тек 1%-дан сәл астамы ғана қорғалады.
Мұндай құжат бекіту идеясы 2002 жылы пайда болған. Келіссөздер ұзақ әрі күрделі жүргізілді.
Белсенді экологтер келісімнің жүзеге асырылуы климаттың өзгеруімен күресу және биоалуантүрлілікті сақтаудағы маңызды факторлардың бірі деп санайды.
Алайда, құжатты әлі БҰҰ-ға мүше мемлекеттердің әрқайсысы ратификациялауы қажет.
Гүлнұр Ғазизқызы
Әл-Фараби атындағы ҚазҰУ журналистика факультетінің түлегі. Еңбек жолын «Қазақ әдебиеті», «Сақшы» газеттерінен бастаған. «Дала мен Қала» республикалық қоғамдық-саяси апталығында тілші, жауапты хатшы болып істеді. «Қазақстан-Ақтау» телеарнасының тілшісі, «Қазақстан» Ұлттық арнасының Маңғыстау облысындағы меншікті тілшісі, Маңғыстау облысы әкімі баспасөз қызметінің бас маманы, «Қазақстан» РТРК» АҚ Маңғыстау облыстық филиалы директорының орынбасары – бас редакторы болды.
Ақпарат саласының үздігі.
«ҚР Президенті телерадиокешенінде» 2022 жылғы 1 сәуірден бастап істейді. Kazinform халықаралық ақпарат агенттігі басқарушы директорының орынбасары – қазақ редакциясының бас редакторы.