Мұнай арзандады, теңге әлсіреді — нарық не дейді

АСТАНА. KAZINFORM — Мұнай бағасы ОПЕК+ тарапынан өндіру көлемінің тағы да ұлғаюы күтілгендіктен 2,4%-ға төмендеді. Альянс мүшелері өндіру көлемін кем дегенде тәулігіне 137 мың баррельге арттыруды мақұлдауы мүмкін деген жоғары ықтималдық бар, деп жазды Қазақстан қаржыгерлер қауымдастығы. 

Валюта нарығы

Дүйсенбі күнгі сауда қорытындысы бойынша USD/KZT жұбының орташа өлшенген бағамы 1 АҚШ долларына 548,77 теңгені құрады (+4,32 теңге), сауда көлемі — 286,6 млн доллар (-47,8 млн). Теңгенің әлсіреуі мұнай бағасының арзандауы аясында, сондай-ақ ай соңында шетел валютасына сұраныстың дәстүрлі түрде артуымен байланысты болды. Бұл сұраныс импорттық келісімшарттар бойынша төлемдер мен сыртқы қарызды өтеу бойынша міндеттемелерін орындайтын қазақстандық компаниялар тарапынан туындайды. Еске сала кетейік, теңгенің шамадан тыс әлсіреуі импорттық тауарлардың қымбаттауына және тұтыну бағаларына валюта бағамының әсер етуі арқылы инфляцияның өсуіне әкелуі мүмкін.

Бүгін басты назарда — өндірістік әдіспен есептелетін ЖІӨ, төлем балансы, сыртқы қарыз, халықаралық инвестициялық позиция, халықаралық резервтер мен Ұлттық қордың валюталық активтері жөніндегі деректердің жариялануы.

Ақша нарығы

Ақша нарығындағы кірістілік көрсеткіштері жүйедегі өтімділік профицитінің салыстырмалы түрде тұрақты деңгейінде түзетілді. TONIA мөлшерлемесі 15,91%-дан 15,74%-ға дейін төмендеді, ал SWAP-1D кірістілігі 11,28%-дан 11,02%-ға дейін төмендеді. Жалпы сауда көлемі 451,5 млрд теңгені құрады (+2,6 млрд). Ашық позиция көлемі шамамен 5,3 трлн теңге нарық алдындағы берешекке тең.

Қор нарығы

KASE индексі аптаны 0,3%-ға өсіммен бастап, 7166,4 тармаққа жетті. Бұл жаһандық қор нарықтарындағы «бұқалардың» басымдығымен байланысты. Индекске қолдау көрсеткен — Қазатомпром (+1,5%) және KEGOC (+0,9%) акциялары. Қалған бағалы қағаздарда әлсіз өзгерістер байқалды: -0,7%-дан +0,4%-ға дейін. Мұндай нарықтық динамика инвесторлардың тұрақты ақша ағыны және валюталық экспорттық түсімі бар компанияларға деген қызығушылығының артуын көрсетеді, бұл — теңгенің әлсіреуі аясында орынды әрекет.

Мұнай

Мұнай бағасы 2,4%-ға төмендеп, барреліне 67,1 доллар болды. Бұл ОПЕК+ ұйымы мұнай өндіру көлемін тағы да көбейтеді деген болжамдарға байланысты. Егер өндіру артса, нарықта мұнай тым көбейіп, бағаға кері әсер етуі мүмкін. Жексенбіге жоспарланған кездесуде ОПЕК+ елдері мұнай өндіруді тәулігіне кемінде 137 мың баррельге көбейту туралы шешім қабылдауы мүмкін.

Тәуекел активтері

АҚШ-тың қор индекстері 0,2-0,5%-ға өсті, себебі инвесторлар үкімет жұмысының тоқтап қалу ықтималдығын елемеген тәрізді. Жасанды интеллект (ЖИ) чиптер сегментінің көшбасшысы Nvidia бағасы өсті, өйткені өткен аптадағы ЖИ-ге қатысты скептицизм кең нарыққа қысым жасаған болатын. Кейбір трейдерлер тіпті Nvidia мен OpenAI арасындағы инфрақұрылымдық жобаны іске асыру үшін энергетикалық ресурстар жеткілікті ме деп күмәнданған. Сауда сессиясы нәтижесінде Nvidia акциялары шамамен 2%-ға өсті. ЖИ секторының басқа компаниялары да өсім көрсетті: Advanced Micro Devices — 1%-дан астам, Micron Technology — 4%-дан жоғары.

Сонымен қатар, АҚШ федералды үкіметінің 1 қазандағы қаржыландыру мерзімі аяқталуына байланысты жұмысының уақытша тоқтап қалу қаупі сақталып отыр. Мұндай жағдайлар әдетте нарықтарға айтарлықтай әсер етпейді, бірақ бұл жолы жағдай басқаша болуы мүмкін. Инвесторлар еңбек нарығының баяулауы, стагфляция қаупі және акциялардың жоғары бағалануы салдарынан сақтық таныта бастады. Бұған қоса, үкімет жұмысының тоқтауы Moody’s агенттігі мамырда төмендеткен АҚШ-тың кредиттік рейтингіне тағы бір рет әсер етуі мүмкін.

Қорғаныс активтері

АҚШ үкіметінің жұмысы тоқтап қалуы мүмкін деген алаңдаушылық аясында тәуекелі төмен активтерге сұраныс артып отыр. Алтын бағасы 1,7%-ға өсіп, бір унциясы 3861 долларға жетті. 10 жылдық қазынашылық облигациялар кірістілігі 4,19%-дан 4,14%-ға төмендеді. Ал доллар индексі 0,3%-ға төмендеп, 97,9 тармақ деңгейінде орнықты.

Еске сала кетейік, бұған дейін Қазақстан Республикасы Ұлттық Банкінің Ақша-кредит саясаты комитеті базалық мөлшерлемені 16,5% деңгейінде сақтау туралы шешім қабылдағанын жазған едік.