Қытайдың Ханжчоу қаласында өтіп жатқан Азия ойындарында қазақстандық биіктікке секіруші Надежда Дубовицкая үздік үштікке ілікті, деп хабарлайды ҚазАқпарат тілшісі.
Қазақстандық жеңіл атлет Азиядағы басты фавориттердің бірінен саналғанымен, 1 метр 86 сантиметрді бағындырып, қола жүлдені қанағат тұтты.
Алтын және күміс медаль өзбекстандықтар Сафина Садуллаева мен Светлана Радзивильдің еншісінде кетті.
Тағы бір қазақстандық Кристина Овчинникова 1,83 метр нәтижемен төртінші орынға табан тіреді.
Биылғы Азия ойындарында Надежда Дубовицкая Қазақстан бокс құрамасының капитаны Асланбек Шымбергеновпен бірге ту көтеріп шыққан еді.
Еске сала кетейік, бұдан бұрын Мария Бровкованың Азия ойындарының қола жүлдегері атанғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).