Назарбаев Университетінде «Дербес медицина және ғаламдық денсаулық» атты ІІ Халықаралық ғылыми конференция өтуде

Назарбаев Университеті «Өмір туралы ғылымдар орталығының» Бас директоры Жақсыбай Жұмаділовтің айтуынша, конференция геномдық және дербес медицина, биоинформатика және ғаламдық денсаулықтану аймағының соңғы ғылыми жетістіктерін инновациялық түрде жан-жақты зерттеуге бағытталған. «Біз жыл сайын өтетін осы іс-шараның геномдық және дербес медицинаның инновациялық жетістіктерін айналымға енгізіп, ғаламдық денсаулық сақтаудың ғылыми негіздерін қалыптастырып, биомедицина саласындағы инновациялық ғылыми бағыттардағы халықаралық ынтымақтастықты дамытуда ашық сұхбат алаңы болатынына сенімдіміз», - дейді Ж. Жұмаділов. Айта кетейік, конференция жұмысына Еуропа және Азия, АҚШ елдерінің ғылыми-зерттеу орталықтары мен университеттерінің жетекші ғалымдары мен мамандары, мемлекеттік мекемелердің басшылары, жоғары оқу орындары, ғылыми-зерттеу орталықтары және практикалық денсаулық сақтау мекемелерінің өкілдері қатысуда. Іс-шара бағдарламасына «Геномдық және дербес медицина дәуірі: мәселелер мен мүмкіншіліктер» және «Микробиом және адам денсаулығы» атты екі панельдік сессия енгізілген. Сонымен қатар, конференция барысында мастер-кластар мен жас ғалымдар, университет студенттері, магистрлері, докторанттарының постерлік сессиясы мен «Үздік постерлік баяндама» атты байқау өткізіледі. Назарбаев Университетінің президенті Шигео Катудың айтуынша, биылғы конференция барлық мемлекеттердегі ғылыми-зерттеу саласында қызығушылықтары бар барлық ғалымдардың басын қосуға бағытталған. «Шара өткізілетін 2 күн ішінде биомедицина мен дербес медицинаның жетістіктері және келешегі,мульти-омдық технология мен оның қолданысы, бмоинформатика, жүйелік биология, ғаламдық денсаулық және микробиомдық зерттеулер сияқты ғаламдық және өзекті мәселелер талқыланады», - деп атап өтті ол.