Назарбаев зияткерлік мектептерінің «Тілге бойлау» әдістемесі бүкіл білім ошақтарына таратылуы мүмкін

АСТАНА. KAZINFORM – Қазақстан мектептерінде Назарбаев мектептерінің ерекше әдістемесі енгізілуі мүмкін. Халықаралық «Қазақ тілі» қоғамының президенті Рауан Кенжеханұлы Kazinform агенттігіне берген сұхбатында осындай мәлімет айтты.

- Біз осы жұмысқа кірісердің алдында Оқу-ағарту министрлігінің мамандарымен ұзақ ақылдасып, министрмен бірге жеке меморандумға қол қойғанбыз. Сол меморандумда сіз сұрап отырған мәселе айтылған. Бір жылдың ішінде оннан астам облыста қазақ тілі және әдебиеті пәндерінің форумын өткіздік. Аймақтардағы 6 мыңдай тіл және әдебиет мұғаліміне осы форумдар аясында «Тілге бойлау» әдістемесін таныстырдық, нәтижесін көрсеттік. Бұл әдістемені іске асырғысы келген балабақша немесе мектептің алғашқы қадамды неден бастау керегін түсіндірдік, - дейді ол.

Аталған әдістеме орыс тілді балабақшалар мен мектептердің тіл оқыту әдістемесіне негізделген. Оны зияткерлік мектептің мамандары қазақ тіліне халықаралық тәжірибені ескере отырып бейімдеген. Мұндай жүйеде баланың айналасы түгел қазақша сөйлеуі керек.

- Шешім қабылдайтын басқармаларға да ұсыныстарымызды жібердік. Бұл әдістемені Қазақстанға әкеліп, бейімдеп, іске асырған – Назарбаев зияткерлік мектептері. Біздің білуімізше, министрлік НЗМ-мен бірге осы жүйені елге тарату жағын бөлек пысықтап жатыр, - деді қоғамның президенті.

Сұхбаттық толық нұсқасын мына сілтемеден оқуға болады.