ЫСТАНБҰЛ. ҚазАқпарат - Бокстан әйелдер арасындағы әлем чемпионатында бүгін, 12 мамырда қазақстандық Назым Қызайбай жарыс жолынан шығып қалды, деп хабарлайды ҚазАқпарат.
Әлем чемпионаты Түркияның Ыстанбұл қаласында өтіп жатыр. Жарыста қазақстандық Назым Қызайбай (50 келі) колумбиялық Ингрит Валенсияға есе жіберіп қойды.
Назым Қызайбай 1993 жылы 14 қыркүйекте дүниеге келген. Бұған дейін әлем чемпионатында 2014, 2016 жылдарда алтын медаль алса, 2012 жылы қола жүлдеге қол созды.
Енді күндізгі сессияда Дина Жоламан (54 келі) испаниялық Мария Мадуэньо Кондемен, Римма Волосенко (60 келі) англиялық Шона Уитуэллмен жекпе-жекке шығады.
Кешкі сессияда Дариға Шәкімова (66 келі) өзбекстандық Навбахор Хамидовамен кездеседі.
Әлем чемпионатына еліміздің атынан 12 боксшы барды.
Олардың қатарынан Аида Әбікеева (63 келі) мен Надежда Рябец (75 келі) қарсыластарына есе жіберіп қойды.
Әлем чемпионаты 20 мамырда мәресіне жетеді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.