Қытайдың Ханжчоу қаласында өтіп жатқан Азия ойындарында қазақстандық боксшы Сағындық Тоғамбай жартылай финалға шықты, деп хабарлайды ҚазАқпарат тілшісі.
Қазақстандық боксшы 92 келіге дейінгі салмақта ирандық Туфан Шарифимен жұдырықтасты.
Сағындық қарсыласын бірінші раундта-ақ ұрып құлатып, жартылай финалға жолдама алды. Осылайша, ол қазіргі сәттегі нәтижесімен кем дегенде қола медаль алады.
Бүгін күндізгі сессияда рингке шыққан екі босшымыз жеңіліп қалды.
Екі дүркін әлем чемпионы Назым Қызайбай 50 келіге дейінгі салмақта ширек финалда күтпеген жерден моңғолиялық Есугэн Оюунцэцэгке жол берді. Сөйтіп Назым жүлдесіз қалды.
Сондай-ақ, биылғы әлем чемпионы Нұрбек Оралбай 80 келіге дейінгі салмақта қытайлық Тоқтарбек Таңатқанға төрешілер шешімімен есе жіберді – 2:3. Биыл әлем біріншілігінің финалында Нұрбек Тоқтарбекті жеңген еді.
Еске сала кетейік, бұдан бұрын Азия ойындарында бүгін Қазақстан құрамасынан бес боксшы шаршы алаңға шығатынын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).