Норвегия мен Швеция сирек кездесетін ақмаңдай қаз үшін келісе алмай жатыр

АСТАНА. KAZINFORM — Норвегия мен Швеция арасында сирек кездесетін ақмаңдай қазды сақтау мәселесіне байланысты дау туындады, деп жазады АЗЕРТАДЖ.

Швеция 1970-жылдардың соңынан бері Ресейден құстарды әкеліп, оларды өсіріп, кейін жабайы табиғатқа жіберу арқылы осы құстың санын арттыруға бағытталған қымбат жобаны жүргізіп келеді.

Ал Норвегия бұл мәселеге неғұрлым пассивті тәсілмен қарайды. Кей жағдайларда шекарадан ұшып өткен швед қаздарын атып тастаған оқиғалар да болған. Жергілікті билік бұл құстарды «жасанды» деп санап, олардың араласуы тарихи көші-қон бағыттарын өзгертіп жібереді деп қауіптенеді.

Аңшылар қауымдастығы бұл әрекетке қарсы.

— Олар швед қазын неге қауіп деп санайтынын түсінбей отырмыз: ол норвегиялық топпен бірге көшеді. Жойылып бара жатқан түр өкілін ғылыми негізсіз жою — халықаралық келісімдерге қайшы, — дейді ұйым өкілдері.

Сондай-ақ олар швед қаздары норвегиялықтарға қарағанда қауіпсіз көші-қон жолдарын пайдаланатынын атап өтеді.

Норвегиялық ақмаңдай қаздар Ресей мен Қазақстан арқылы Грекияға ұшады, ал Швеция 1980-жылдары өз құстарының бағыттарын өзгертіп, Германия мен Нидерланды арқылы өткізуді бастаған.

— Швед популяциясы Финляндия, Эстония, Мажарстан және Грекиямен ортақ жабайы популяциямызға қауіп төндіреді. Жасанды популяциямен араласу және тарихи көші-қон жолының бұзылуы — мүлде қабылдауға болмайтын жағдай және халықаралық ұсыныстарға қайшы келеді, — деп мәлімдеді норвегия тарапы.

Бұдан бұрын жапондық алып устрица Швеция жағалауына жайылып жатқанын жазғанбыз.