«Нұр Отан» партиясы аса маңызды мәселелер жайында пікір айтылатын алаңға айналып отыр - Н. Ерімбетов

АСТАНА. 27 желтоқсан. ҚазАқпарат - «Қазақстанның Азаматтық Альянсы» Заңды тұлғалар бірлестігінің президенті, «Нұр Отан» Саяси кеңесінің мүшесі Нұрлан Ерімбетов бүгінгі таңда партия қоғамның аса маңызды мәселелері туралы пікірлер айтылатын алаңға айналуда деп санайды.

«Саяси кеңестің отырыстарында түрлі пікірсайыстарға қатысып жүремін. Бүгінде партия түрлі сарапшыларды шақыра отырып, күрделі, кейде билік үшін қолайсыздау мәселелерді көтереді. Мұны партия жұмысындағы ілкімділік деп бағалаймын», - деді Нұрлан Ерімбетов. Н. Ерімбетов оған мысал ретінде «Қазақстан-2050» Демократиялық күштердің жалпыұлттық коалициясының отырысын атады. «Биылғы жылы оның жұмысы жандана түсті деуге болады. Сан алуан пікірдегі адамдар жиылып, күн тәртібіндегі күрделі мәселелерді талқылады», - деп атап өтті саясаттанушы. Дегенмен, алдағы жылда партия жанындағы пікірсайыс алаңдарының жұмысын арттыру қажет деп санайды сарапшы.

«Жалпы алғанда, партияның өз ішінде қызу пікірталас болуы керек, ол жоқ емес, бар, тек оны күшейту қажет. Қандай да бір мәселеде пікір қайшылығы туындайтын түрлі топтағы адамдар, партия мүшелері «Нұр Отан» партиясының алаңдарында өз ойларын еркін жеткізе білуі керек. Бұл тұрғыдан, партия бүгінгі таңда көзқарасы билік құрылымдарының пікіріне сай келе бермейтін адамдарға өздерінің ашықтығын көрсетіп отырғанын байқаймын», - дейді Нұрлан Ерімбетов.

Сондай-ақ, саясаттанушы партия үшін ең маңыздысы - қазіргі билікке қарсы пікір білдіруші ұйымдардың өкілдерін пікірталасқа шақырып, олармен пікір таластырудан қашпай, өз ойын білдіріп, ортақ мәселелерді шешу қажеттігін атап өтті.