«Нұр Отан» партиясының Орталық аппаратында «Әлеуметтік кәсіпкерлік корпорациялар туралы» заң жобасы талқыланды

АСТАНА. Сәуірдің 30-ы. ҚазАқпарат /Жасұлан Аманбайұлы/ - Бүгін «Нұр Отан» халықтық-демократиялық партиясының Орталық аппаратында партия Төрағасының бірінші орынбасары Дархан Кәлетаевтің және Премьер-Министрдің бірінші орынбасары Өмірзақ Шөкеевтің қатысуымен Әлеуметтік кәсіпкерлік корпорациялар (ӘКК) қызметіне арналған кеңес өтті,

деп хабарлайды ҚазАқпарат. Отырысқа ҚР Парламенті Мәжілісінің депутаттары, «Самұрық-Қазына» ҰӘАҚ және ӘКК басшылары қатысты. Негізгі әңгіме арқауы «Әлеуметтік кәсіпкерлік корпорациялар туралы» заң жобасы болды. Аталмыш құжат 2008 жылғы маусым айында Парламент Мәжілісінен кері, құзырлы органдарға қайта жетілдіруге жіберілген болатын. «Заң жобасының жаңа жасақталған тұжырымдамасына сәйкес ӘКК-нің, «Самұрық-Қазына» Қорының және оған тиесілі компаниялардың арасындағы басқару жүйесі өзгертілді. Мақсаты мен қызметін реттейтін баптар қайта құрастырылды. Ал ӘКК-на қойылған бастапқы міндеттер, принциптер қалып отыр. Мәселен, ӘКК таза пайдасының тең жартысын өзі қызмет етіп жатқан аймақтың әлеуметтік жағдайына жұмсау талабы сол қалпында қалды», - дейді Экономика және бюджеттік жоспарлау вице-министрі Тимур Сүлейменов.Премьер-Министрдің бірінші орынбасары, әлеуметтік кәсіпкерлік корпорацияларға бұл заң өте қажет екендігін баса айтты. «Олар әкімдіктер мен кәсіпкерлер арасындағы жалғаушы буын іспетті. Кәсіпкерлердің әлі келмеген тапсырыстарды осы ӘКК қолға ала алады. Сондықтан тараптар арасындағы қарым-қатынас заң жүзінде реттелуді қажет етеді», - деді Ө.Шөкеев.Премьер-Министрдің бірінші орынбасарының айтуынша, әлеуметтік кәсіпкерлік корпорациялар Үкіметтің инфрақұрылымдық, әлеуметтік, коммуналдық тапсырыстарын орындауға жұмылдырылады. Бұл әкімдіктердің қызметіне де көмегін тигізбек.