ОРАЛ. ҚазАқпарат - Батысқазақстандық Нұрберген Жұмағазиев Оңтүстік Кореяның Каннын қаласында шорт-тректен әлем кубогының төртінші кезеңінде жеңімпаз атанды, деп хабарлайды ҚазАқпарат тілшісі.
Sports.kz">Sports.kz сайтынан алынған мәліметке қарағанда, Нұрберген 1 мың метр қашықтықта бірінші келсе, канадалық Паскаль Дион мен Патрик Даффи екінші және үшінші орынды бөлісті. Қазақстандық шорттрекшіге финалда үш бірдей өкілі өнер көрсеткен айдын иелері де ілесе алған жоқ.
Айта кетейік, осымен биыл қазақстандық шорт-трекшілер екінші рет әлем кубогы кезеңінің жеңімпазы атанып отыр. Мұның алдында тағы бір батысқазақстандық Абзал Әжіғалиев қараша айында Солт-Лейк-Сити (АҚШ) қаласында 500 метр қашықтықта алдына жан салмаған болатын. Осыған дейін қазақстандық шорттрекшілер мұндай табысқа қол жеткізбеген еді. Абзал мен Нұрберген кезінде Оралдағы жабық мұз айдыны сарайында Қазақстанның еңбек сіңірген жаттықтырушысы Мәдіғали Қарсыбековтің басшылығымен алғашқы қадамдарын бастаған болатын. Олар Сочи олимпиадасында Қазақстан құрамасы сапында 5 мың метр қашықтықта эстафеталық сында финалға дейін жетіп, бесінші орынды иеленген еді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).