Нұрсұлтан Назарбаев облыс әкімдеріне тоқтап тұрған кәсіпорындарды іске қосуды тапсырды
Мемлекет басшысы бұған дейін елімізде іске қосылған жалпы сомасы 150 млрд. теңгені құрайтын 72 жобаның толық жүктемеде жұмыс істемей тұрғандығын сынады.
«Демек, Жеңіс (Инвестициялар және даму министрі Қасымбек) бірінші пакетте Исекешевті (бұрынғы Инвестициялар және даму министрі, қазір Астана қаласының әкімі) айтуыңа болады, «бұрынғыға жаба сал» деп аталады. Лауазымға келгенде үш пакет жасау керек. Бірінші пакет өзінің алдыңда болған адамға жабу. Екінші пакет өзіңнің жастығың. Үшінші рет келесіге үш пакет әзірлеу қажет. Бірінші пакет Исекешевке. 72 сенің (Исекешев) кәсіпорның, сен қазір қала әкімісің. 72 кәсіпорынның құны 150 млрд. теңге. Бізде әрбір кәсіпорынмен жеке-жеке жұмыс жүргізіле ме? Әрқайсымен, облыстарда. Неғып тұр олар? Қырымбек, Ақтөбеде салынатын әйнек зауытын сен сұрағаннан кейін Сырдың жанындағы елдің жағдайы нашарлау, жұмыс орны болсын деп ана жақтан алып саған бердік. Сендер қалай салып жатырсыңдар?», - деп сұрады Елбасы Қызылорда облысының әкімі Көшербаевтан.
«Жақында Асқар Ұзақбайұлы (Премьер-Министрдің орынбасары Мамин) болды. Аманшылық болса, қазанда құрылысы бітіреміз деп жоспарлаудамыз», - деді облыс әкімі.
Келесі кезекте Президент Қостанай облысында құны 3,3 млрд. теңгені құрайтын құс етін шығаратын кәсіпорын да тоқтап тұрғанын айтты.
«2013 жылдан бері сот болып жатыр. Жақында ғана барлығы аяқталды. Құрылтайшылар 3 жылдай бір-бірімен соттасты. Сол себепті тоқтап қалды. Жақында ғана сот шешімі күшіне енді. Қазагромен шешім қабылдауда», - деді бұл мәселеге қатысты сөз алған Қостанай облысының әкімі Архимед Мұхамбетов.
Мемлекет басшысы Қарағанды облысында құны 1 млрд теңгені құрайтын болат радиаторлар шығаратын зауыттың да тоқтап тұрғанын атап өтті.
«Бұл мәселені білеміз. Құрылтайшысы сотталған соң тұрып қалды. Оны қазір ары қарай жүргіземіз», - деді өңір басшысы Нұрмұхамбет Әбдібеков.
«Екеуіңде құрылтайшы деп отырсыңдар. Мына жерде Жоғарғы сот та, Бас прокурор да отыр. Кім керек, саған? Оларды шақырып алып не шешіңдер, не кетіңдер деп айтатын адам жоқ па? Сендерді жергілікті жерге қожа болсын, елдің шаруасын шешсін деп тағайындадым. Не істесе оны істесін деп көздеріңді бақырайтып қарап отырасыңдар ма? Үкіметке келіңдер, бәрін шақырып алыңдар, жұмыс істеткізіңдер. Істейсіңдер, болмаса, басқаға береміз деу керек», - деп ескертті Президент өңір басшыларына.