Облыс әкімі Ақтөбедегі Жасөспірімдер үйі тәрбиеленушілерінің жас отбасына пәтер кілтін табыс етті
Әсел Мұлқанова мен Максим Чебохиннің отбасы құру туралы ниеттері мамыр айында естіген Елеусін Сағындықов жастардың тойларын ұйымдастыруға және пәтер алуларына көмектесуге уәде берген еді. Сол жолы әкім жастарға 150 мың теңге көлемінде ақшалай сыйлық беріп, тойларын өткізуге көмектесті.
2009 жылдың қараша айында Әсел мен Максимнің тұңғыштары дүниеге келеді. Елеусін Сағындықов, оларға екінші бала туылған соң, баспаналарын екі бөлмелі пәтерге ауыстыруға көмектесуге уәде беріп отыр.
Жетім балаларды қолдау туралы айтқан әкім, ондай істердің бірді-екілі шаралармен шектеліп қалмауы керек екенін атап көрсетті.
«Біз жетім балаларды қолдаудың ақтөбелік үлгісін жасау жолында жұмыс істеп келеміз. Балалар үйлерінің түлектері демеушілердің қаражаты мен өз тұрғын үй жинақтарына баспана алуларына жағдай жасаудамыз», деді әкім өз сөзінде.
Бұл - атқарушы биліктің қолдауымен өз баспанасына ие болып отырған Жасөспірімдер үйі тәрбиеленушілерінің екінші отбасы. Жылдың басынан бері облыс әкімінің қолдауымен 10 жетім бала баспанаға ие болды. Жеті жетім әкімдіктің көмегімен Тұрғынүйқұрылысжинақбанкінде есепшот ашты және демеушілерден көмек алды. Жақын арада олар да пәтерлерін алып қалады.
Облыс әкімі сондай-ақ, биыл Жасөспірімдер үйінен ұшырылатын 14 жетім баланың да жағдайын ойластыруда. Демеушілік қаржы мен тұрғын үй жинақтарының көмегімен олар да өз пәтерлеріне ақша жинайтын болады.