Абай аудандық полиция бөліміне қаладағы дәріханалардың біріне қарақшылық шабуыл жасалғаны туралы хабарлама 24 қаңтар күні келіп түскен.
«Анықталғандай, бетперде киген белгісіз тұлғалар дәріханаға баса-көктеп кіріп, сатушыны пышақпен қорқытқан. 700 мың теңгеден астам ақшаны алып, кете бере сатушының аяқ-қолын скотчпен байлап кеткен. Аталмыш факті сотқа дейінгі тергеп-тексеру бірыңғай тізіліміне ҚР ҚК-нің 192-бабы («Қарақшылық») бойынша тіркелді», - деп атап өтті Шымкент қалалық ІІД-нің баспасөз қызметінен.
Алайда, тәртіп сақшылары жедел-іздестіру шараларын өткізу барысында аталмыш қарақшылық шабуылдың жалған екенін анықтады.
Қазіргі уақытта жалған хабар берген дәріхана қызметкері ұсталып, оның үстінен Қылмыстық кодекстің 419-бабы («Көрінеу жалған сөз жеткізу») бойынша іс қозғалды.
«Ол қылмыстық жауапкершілікке тартылатын болады», - деп нақтылады ІІБ-ден.
Әйелдің бұл әрекетінің себебін және ақшаның ұрланған, не ұрланбағанын тергеушілер анықтау үстінде.