ОҚО: Мақтааралдық шаруалар қауын-қарбыздың алғашқы легін Ресейге жөнелтті

АСТАНА. ҚазАқпарат - Оңтүстік Қазақстан облысында бақша өнімдерін өндірумен танымал Мақтааралда қауын-қарбыз пісті. Ерте пісетін бақша дақылының түрін еккен шаруалар бүгінде 55 тонна қауын, 45 тонна қарбыз жинап, алғашқы өнімін Ресей мемлекетіне жөнелте бастады, деп хабарлайды облыстық әкімдіктің баспасөз қызметі.

Мақтаарал ауданында бақша өнімдері былтырғыға қарағанда 10-15 күн ерте пісіп отыр. Биыл ауданда жалпы 19 500 гектарға  қауын, 8 мың гектардан астам жерге қарбыз  егілген.  Оның ішінде ерте егілген бақша дақылдарының көлемі 13200 гектарды құрайды.

Қарбыздан алғаш боп өнім алған «Әбіш-ата» шаруа қожалығы 20 тонна өнімін сыртқы нарыққа шығарып отыр. Қарбыздың келісі 140 теңгеден. Аталған қожалық 3 гектар жерге егілген қарбыздың гектарына 30 тоннадан астам өнім алуды жоспарлап отыр.

Диқаншының жұмысына сәттілік тілей келген аудан әкімі Жамантай Бейсенбаев «Әбіш-ата» шаруа қожалығынан өнімнің алғашқы легі артылып жатқан сәтке куә болды.

«Мақтаарал ауданының негізгі күнкөрісі - егіншілік. Сондықтан мұндағы диқандар көктемнің әрбір күнін тиімді пайдалануды ойлайды. Екі қабатты пленкаға ерте пісетін қауын-қарбыз, баялды, болгар бұрышын егеді. Бүгін міне, қарбыздың алғашқы өнімі Ресейдің Якутия автономиялық республикасына сатылымға жөнелтілді. Биыл шаруалардың өнімі өтімді әрі өнімді болады деген сенім мол», - деді аудан әкімі.

Айта кетейік, былтыр Оңтүстік Қазақстан облысының диқандары 1 миллион 300 мың тонна бақша өнімдерін өндірсе, соның 631 мың тоннасы мақтааралдық диқандарға тиесілі болатын.