Оқу-жаттығу сценарийі бойынша, диспетчерге келіп қонған ұшақ бортында коронавирусқа шалдыққан адам бар екендігі хабарланады. Бортқа дереу қорғаныс костюмін киген санитарлық-каратиндік бақылау мамандары көтеріледі. Медициналық сауалнама кезінде соңғы екі аптада оның Қытайда болғандығы, кейін Өскеменге туысының қалын білуге келгендігі анықталады. Қолдан дайындалған тепловизордың көмегімен науқастың дене қызуы тексеріліп, артынша жұқпалы дертке шалдықты деген күдікпен әуежайдың санитарлық-карантиндік пунктіне жеткізіледі.
Сондай-ақ мамандар алғашқы медициналық көмек көрсету және зерттеу үшін биоматериал алу жұмыстарын жүргізді. Одан бөлек, науқасты арнайы капсулаға салып, Өскемендегі жұқпалы аурулар стационарына жеткізу жолы түсіндірілді.
«Қысқа мерзім ішінде коронавирус бірқатар мемлекетте таралып, жұқпалы дерт біздің аумаққа да еніп кете ме деген үрей туды. Сондықтан осындай шараларды жиі өткізіп тұрған жөн. Бүгін адам коронавирус дертін жұқтыру жағдайы туындаған кезде орындалатын жұмыстар туралы оқу-жаттығу жүргіздік», – дейді Тауарлар мен көрсетілетін қызметтердің сапасы мен қауіпсіздігін бақылау департаменті санитарлық-карантиндік бақылау бөлімінің бас маманы Анар Сабырбаева.