Іріктеу кезеңіне еліміздің барлық өңірінен 46 мыңнан астам оқушы қатысты. Оның нәтижесінде жоғары білім деңгейі мен құзыреттіліктерін көрсеткен ең үздік 144 қатысушы финалға жолдама алды.
Оқу-ағарту министрлігі мәліметінше, олимпиада қаржылық сауаттылық және қаржылық қауіпсіздік саласында терең білім, білік және дағдысы бар дарынды оқушыларды анықтауға, сондай-ақ білім алушылар арасында қаржылық мәдениетті дамытуға және насихаттауға бағытталған.
Олимпиаданың қорытынды кезеңі екі турдан тұрды: жазбаша және ауызша. Тапсырмалар қатысушылардың қаржылық шешім қабылдау кезіндегі сыни ойлау деңгейін, қауіпсіз қаржылық мінез-құлық дағдыларының қалыптасуын, сондай-ақ қаржылық ақпарат көздерімен жұмыс істеу қабілеттерін бағалауға бағытталды.
Сонымен қатар қатысушылар қаржы құралдарын тиімді пайдалану және қаржылық тәуекелдерден қорғану бойынша практикалық құзыретін көрсетті.
Олимпиада қорытындысы бойынша 54 жеңімпаз бен жүлдегер анықталды. I дәрежелі дипломмен 11 қатысушы, II дәрежелі дипломмен 16 қатысушы, III дәрежелі дипломмен 27 қатысушы марапатталды. Сонымен қатар 4 қатысушыға грамота табысталды.
Олимпиаданы өткізу оқушылардың қаржылық мәдениетін арттыруға, қаржылық қауіпсіздік негіздерін қалыптастыруға және өмірлік маңызды шешім қабылдау дағдыларын дамытуға ықпал етеді.
Олимпиаданы Қазақстан Оқу-ағарту министрлігінің «Дарын» республикалық ғылыми-практикалық орталығы, Ұлттық Банк және Қаржылық мониторинг агенттігі бірлесіп ұйымдастырды.
Қазақстандық оқушылар экологиялық мәселелерді шешуге арналған суасты роботын жасағанын жазған едік.