АСТАНА. KAZINFORM — Грекияда алдағы жарыстарға дайындалып жатқан Александр Винокуровтың ұлы жаттығу кезінде жол-көлік оқиғасына тап болды.
«XDS Astana Development Team» командасынан мәлім еткеніндей, велосипедші бұрылыстан кенеттен шыға келген автокөлікпен соқтығысып қалған.
Медициналық тексеріс нәтижесінде оның оң жақ жамбасы сынғаны анықталды. Жақын арада Александрға жамбас сүйегіне ота жасалады, содан кейін ол қалпына келу кезеңінен өту үшін Францияға жіберіледі.
— Қазіргі уақытта спортшының жағдайы тұрақты. Команда оған қажетті барлық қолдауды көрсетуде және тез сауығып кетуін тілейді, — деп хабарлады XDS Astana командасы.
Александр Винокуровтың 2012 жылы Лондон Олимпиадасында алтын алғаны мәлім. Оның ұлы Александр да әке жолын қуған.
Еске сала кетейік, бұдан бұрын Азия чемпионатында пара велоспортшылар алтын алғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).