НҰР-СҰЛТАН. ҚазАқпарат - Қытайдың Бейжің қаласында өтіп жатқан қысқы Олимпиада ойындарында шайбалы хоккейден ерлер арасында финалға шыққан құрамалар анықталды, деп хабарлайды ҚазАқпарат тілшісі.
Мұндай мүмкіндікке Ресей және Финляндия құрамалары ие болды. Жартылай финалда Ресей Швецияны 2:1, Финляндия Словакияны 2:0 есебімен тізе бүктірді.
Енді 19 ақпанда 3-орын үшін Словакия мен Швеция шеберлік байқасады. Ал 20 ақпанда финалда Ресей мен Финляндия мұзайдынға шығады.
Бұған дейін Ресей (КСРО-ны қоса есептегенде) 9 алтын, 2 күміс, 2 қола медаль алды. Ал Финляндия 2 мәрте күміс жүлдегер атанса, 4 мәрте қола жүлдеге қол созды.
Сондай-ақ, әйелдер арасында шайбалы хоккейден Олимпиада чемпионы атағына Канада ие болды. Канадалық хоккейшілер финалда АҚШ-ты 3:2 есебімен жеңді. 3-орын үшін сайыста Финляндия Швейцариядан 4:0 есебімен басым түсіп, қола жүлдеге қол созды.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.