ПАРИЖ. KAZINFORM — Қазақстанның екінші, әлемнің 58-ракеткасы Александр Шевченко Париж Олимпиадасының алғашқы айналымынан аса алмады.
Қазақстандық теннисші дүниежүзілік рейтингіде 81-орында тұрған 18 жастағы чехиялық Якуб Меншикпен кортқа шықты.
Бірінші партияда Меншик 3:0 есебімен алға кетіп, сол басымдылықты сақтап қалды – 6:3.
Екінші сетте есеп 2:2 болған мезетте чехиялық спортшы брейк жасап кеткенімен, Шевченко сол бойда қарымта қайырды – 3:3. Бірақ Меншик тағы бір брейкке қол жеткізіп, матчқа доп бергенде, мүмкіндігін жіберген жоқ – 6:4.
Бір сағаттан астам уақытқа созылған матчта Шевченко 2 эйс, 1 брейкпен шектелді. Меншик 3 эйс, 3 брейкпен (10 брейк-пойнт) көзге түсті.
Осылайша, теннис турнирінде Қазақстаннан жұптық сында өнер көрсететін Александр Бублик пен Александр Недовесов қана қалды.
Еске сала кетейік, бұдан бұрын Олимпиадада Александр Бубликтің алғашқы кездесуінде жеңіліп қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).