АСТАНА. ҚазАқпарат – Малайзияның Малакка қаласында WKF каратэден ересектер арасында өтіп жатқан XIX Азия чемпионатында Софья Берульцева жеңімпаз атанды, деп хабарлайды ҚазАқпарат тілшісі.
«Спортты дамыту дирекциясы» РМҚК-ның баспасөз қызметінен мәлім еткеніндей, құрлықтық бәсекеге 31 елден 400-ге жуық татами шебері қатысуда.
Соның ішінде 19 қазақстандық каратэші ел намысын қорғауда.
Жарыстың алғашқы күні кумите бағдарламасында Токио олимпиадасының қола жүлдегері, ұлттық құрама көшбасшысы Софья Берульцева 68 келіден астам салмақта қарсылас шақ келтірмей, үздік шықты.
Тағы бір қазақстандық Дидар Әмірәлі финалда ғана ұтылып, күміс медальға ие болды. Кумитеде Жоламан Биғабыл (55 кг), сондай-ақ ката бағдарламасында Лия Қошқарбаева үздік үштікке ілікті.
Азия біріншілігі 23 шілдеде мәресіне жетеді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).