НҰР-СҰЛТАН. ҚазАқпарат - Токио Олимпиадасының футбол турнирінде бақ сынайтын құрамалардың толық саны белгілі болды, деп хабарлайды ҚазАқпарат тілшісі.
Дүбірлі додада барлығы 16 құрама жасыл алаңға шығады. Олардың арасында Еуропадан - Франция, Германия, Испания, Румыния; Азиядан - Австралия, Оңтүстік Корея, Сауд Арабиясы; Оңтүстік Америкадан - Бразилия, Аргентина; Солтүстік Америкадан - Мексика мен Гондурас; Африкадан - Египет, Кот-д'Ивуар; Оңтүстік Африка, мұхит аймағынан - Жаңа Зеландия келеді.
Сондай-ақ, олардың қатарына айтулы аламанды өткізетін ел ретінде Жапония құрамасы қосылады.
Аталған турнирдің жеребесі 21 сәуірде FIFA штаб-пәтерінде тартылады. Футбол турнирі 22 шілде мен 8 тамыз аралығында Токио (екі стадион), Сайтама, Иокогама, Ибараки, Сендай және Саппоро қалаларында өткізіледі.
Естеріңізге сала кетелік, Токио Олимпиадасы былтыр өткізілуі тиіс болатын. Әлемде коронавирус инфекциясының таралуына байланысты кейінге шегерілді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.