Өңірде «Жастар тәжірибесі» бағдарламасы 84 млн. теңгеге бағаланып отыр

ҚЫЗЫЛОРДА. Маусымның 30-ы. ҚазАқпарат /Руслан Игілік - Үстіміздегі жылы қатарға қосылған «Жастар тәжірибесі» бағдарламасы үшін облыстық бюджеттен 84,0 млн. теңге қаржы қаралып отыр.

Бұл қаржы мамандардың пікірінше, 700 адамды осы бағдарламаның аясында жұмысқа тартуға жетіп-артылатын көрінеді.

Қазір алдын ала жасалған жоспар бойынша 147 мекемемен келісімшарт жасалып, оларға 509 адамның орналасуы қамтамасыз етілді. Оларға 24,1 млн. теңге еңбекақы төленді. Бұл бағдар­ла­маға негізінен орта, жоғары оқу орындарын бітіріп, кәсіби мамандық алған, алайда жұмыссыз жүрген жастар тартылуы тиіс. Олар келісімшарт негізінде еңбек етіп, тәжірибе жинақ­тайды, өз кәсібінің қыр-сырына қаны­ғады. Алты ай еңбек еткен оларға мемлекеттік бюджет есебінен белгілі бір мөлшерде еңбекақы төленеді.

Кейінгі тәжірибе көрсетіп жүрге­ніндей, алғашқы еңбек жолдарын осылай бастаған көп жастар өз мамандық­тарына сай қызметке орналасып кетеді. «Жастар тәжірибесі» бағдарламасы аясында өзіне жұмыс іздейтіндердің көпшілігі заңгер, есепші, эколог, мұғалім, экономист, инженер-гидротехник, бағдарламашы болып келеді. Осы мамандықты көп қажет ететін мектеп­тер мен түрлі салалық мекемелер қалалық жұмыс­пен қамту және әлеуметтік бағдар­ламалар бөлімімен алдын ала келісімшартқа отырып, өздеріне қажетті мамандық иелерін жұмысқа тартады.

- Бұл екі жаққа да тиімді,- дейді бөлім бастығының орынбасары Жәми Жаниязов. - Жастар тәжірибе жи­нақтап, маманданады. Әрі еңбек­ақы алады. Ал мекеме өзінің айлық қорын үнемдейді, әрі оқу орнын енді бітірген жасты мамандыққа баулиды.