Оңтүстікте пиязды кептіру цехы іске қосылады
Осы бастаманы қолға алған «Март» ЖШС пияз өсірумен айналысатын шаруа қожалықтарының басын біріктіруді жоспарлап отыр, деп хабарлайды ҚазАқпарат ХАА тілшісі.
Серіктестік цехтың құрал-жабдықтарын «Оңтүстік» Аймақтық инвестициялық орталығы (АИО) арқылы лизингке сатып алмақ. Кәсіпорынның ерекшелігі - нарықта сұранысқа ие болмауы салдарынан қалдыққа айналған, даладан жинап алуға да жарамай қалған өнімдерді кептірумен айналысуында. Басты мақсат - пияз өнімін ысырапсыз жинап алып, уақытылы саудалауда болмақ. Әрі жарамсыз күйге түскен өнімді кәдеге жаратпақшы. Осылайша диқандар пияздарын нарыққа шығарумен қоса, олардың жарамайтындарын қалдықсыз әрі қосымша пайдамен жұмыс істеу мүмкіндігіне ие болады. Оған қоса, шаруалардың бірігіп жұмыс істеуінің арқасында кооператив құрылып, кіші шаруа қожалықтары ірі кәсіпорынға айналады.
Айта кету керек, Ордабасы ауданындағы диқандардың негізгі бөлігі пияз өсірумен айналысады. Осыған орай ауданда «ОҢТҮСТІК» АИО өкілдері кооператив құруға ниетті шаруалардың басын қосып, семинар-тренинг өткізді.
Өз кезегінде «ОҢТҮСТІК» АИО Басқарма басшысының орынбасары Дәулет Мамыров кооператив арқылы біріге жұмыс жасаған шаруаларға мемлекет тарапынан көптеген жеңілдіктер мен несие алудың жолдарын түсіндіріп берді.
«Кооперативтерді қаржыландыру бізде басым бағыт ретінде қаралып отыр. Егер бірігуге ниетті шаруа қожалықтары болса, бізден кеңес алуына болады. Сондай-ақ біздің орталық бизнес жоспар әзірлеу, құжат жинау секілді маңызды шаруаларға қол ұшын бере алады»,- деді Дәулет Мамыров.
Ал, кәсіпкерлерге қызмет көрсету орталығының маманы ауылшаруашылық кооперативтерін құрудың негізгі артықшылықтарына тоқталып, ой бөлісті.