Оңтүстік Корея мектептерде смартфон қолдануға тыйым салады
АСТАНА. KAZINFORM — Ұлттық Ассамблея келесі оқу жылынан бастап оқушылардың смартфондар мен басқа да цифрлық құрылғыларды сабақ кезінде қолдануына шектеу қоятын жаңартылған заң жобасын мақұлдады, деп хабарлайды Yonhap.
Мұндай шешім смартфондардың оқушыларға келтіретін ықтимал зиянына байланысты қабылданды.
Оңтүстік Корея Білім министрлігінің мәлімдеуінше, 1 наурыздан бастап бастауыш, орта және жоғары сынып оқушыларына сабақ кезінде смартфон мен оған ұқсас құрылғыларды қолдануға тыйым салынады.
Yonhap агенттігінің хабарлауынша, ел билігі жастардың смартфонға тәуелді болуына қатысты алаңдап, мектептерде оларды қолдануды шектеуге тырысып жатыр.
2023 жылдың қыркүйегінен бастап Білім министрлігі сабақ кезінде смартфон мен басқа да портативті құрылғыларды қолдануға шектеулер енгізе бастаған. Ал жаңа өзгерістер осы шектеулерге құқықтық негіз болмақ.
Дегенмен, тыйымға кейбір жағдайларда рұқсат берілген: мүмкіндігі шектеулі оқушылар үшін, төтенше жағдайларда және білім беру мақсатында қолдануға болады.
Бұл тыйым күшіне енгеннен кейін Оңтүстік Корея мектепте смартфон мен цифрлық құрылғыларды қолдануға шектеу қойған елдердің қатарына қосылады.
Айта кетейік, бұған дейін 2025–2026 оқу жылдары Бельгияның бастауыш және орта мектептерінде де мобильді телефон мен басқа электрондық құрылғыларды қолдануға ұлттық деңгейде тыйым салынатыны хабарланған болатын.