Оңтүстік Корея президенті Ли Чжэ Мён алты министрліктің басшылығына кандидаттарды ұсынды. Бұл туралы президент хатшылығының басшысы Кан Хун Сик мәлімдеді.
Кадрлық өзгерістер Қаржы, Әділет, Қорғаныс, Отбасы және гендерлік теңдік, Мемлекеттік аумақтар және инфрақұрылым, сондай-ақ Шағын, орта және венчурлық бизнес министрліктерін қамтиды.
Қорғаныс министрі қызметіне Оңтүстік Корея мен АҚШ Қарулы күштерінің біріккен қолбасшылығы басшысының бұрынғы орынбасары, қазіргі уақытта елдің Сауд Арабиясындағы елшісі қызметін атқарып жүрген Кан Син Чхоль ұсынылды.
Қаржы министрі қызметіне қазіргі ведомство басшысының орынбасары Ли Хён Иль кандидат ретінде ұсынылды. Әділет министрлігін биліктегі партияның депутаты Ким Сын Вон басқаруы мүмкін.
Мемлекеттік аумақтар және инфрақұрылым министрі қызметіне қазіргі министрдің орынбасары Хон Чжи Сон ұсынылды. Отбасы және гендерлік теңдік министрі қызметіне Негізгі табыс партиясының депутаты Ен Хе Ин, ал Шағын, орта және венчурлық бизнес министрі қызметіне биліктегі «Тобуро» партиясының депутаты Ли Со Ён ұсынылды.
Тағайындалмас бұрын кандидаттар парламентте тыңдаудан өтуі керек. Алайда оларды бекіту үшін Ұлттық ассамблеяның келісімі талап етілмейді.
Бұл 2025 жылғы маусымда қызметіне кіріскен Ли Чжэ Мён әкімшілігі кезіндегі министрлер кабинетіндегі алғашқы ірі кадрлық ауыс-түйіс болмақ.
Шілде айында Венчурлық бизнес министрі Хан Сон Сук премьер-министр болып тағайындалған. Бұл қызметті атқарған Ким Мин Сок биліктегі партия төрағалығына сайлауға түсу үшін қызметінен кеткен. Тамыз айында прокуратура реформасы аясында Әділет министрі де отставкаға кеткен.
Еске салайық, бұған дейін Қазақстан азаматтары 2028 жылдан бастап Оңтүстік Кореяда ресми жұмыс істей алатынын хабарлаған едік.