Оңтүстік Кореяның 14 мергені Дүниежүзілік көшпенділер ойындарына қатысып жатыр

АСТАНА. KAZINFORM – Елордада өтіп жатқан Дүниежүзілік көшпенділер ойындарына Оңтүстік Кореяның 14 мерген келді. Кәрістер садақ атудан Париж Олимпиадасындағы жетістігін қайталай ала ма, елдегі садақ ату спорты қаншалықты маңызды? Бұл туралы Оңтүстік Кореяның ұлттық садақ ату бірлестігінің аға менеджері Ким Хён Су айтып берді. 

«Ең алдымен Дүниежүзілік көшпенділер ойынына екінші рет қатысып отырғанымызға өте ризамыз. Ойындардың ашылу салтанатын да тамашаладық және өте жоғарғы деңгейдегі іс-шара деп бағаладық. Сосын Қазақстанға Кеңес одағы заманында көптеген кәрісдің қоныс аударғанын біліп отырмын. Сол үшін қазақ пен кәріс бірге тұрып жатқан ел болғандықтан, мұнда сапарлап келгенімізге өте қуаныштымын. Дәстүрлі садақ ату жағынан кәрістер әлдеқайда мықтырақ. Париж Олимпиадасына барған спортшылар да бірінші дәстүрлі садақпен атуды үйреніп, содан кейін еуропалық садақты үйренген. Көшпенділер ойындары мен Олимпиаданың бағыттары әртүрлі болғандықтан, Астанаға басқа мергендерімізді алып келдік», - дейді Ким Хён Су агенттік тілшісіне берген сұхбатында. 

Кореялық қонақ өз елінде садақтың ең кемі 7 мың жылдық тарихы бар екенін жеткізді. 

«Кореяның Ульсан қаласында ежелгі бір үңгірден садақпен кит атып жатқан сурет табылған. Бұл сурет шамамен 7 мың жыл бұрын салынған деп жатыр. Кәрістердің садағы басқалардан кішірек, ыңғайлы, сондықтан да елімізде бұл спорт кеңінен тараған. Елімізде 400-ге жуық садақ ату орталықтары жұмыс істейді. Онда кез келген адам садақтың жасалу жолымен танысып, тегін жаттыға алады. Кей мектептерде жасөспірімдерге арналған садақ ату сабақтары өткізіледі», - деді спикер.

Оның айтуынша, келесі жылы Оңтүстік Кореяда садақ атудан халықаралық жарыс өтеді.

«Негізі бұл іс-шара 19 жыл бұрын басталып, 9 рет өткізілді және 10 жыл бойы тоқтап тұрды. Соны қайтадан жандандыруды ойластырып отырмыз. Бұл ұлттық садаққа байланысты ойындар болады. Әлемнің түпкір-түпкірінен спортшыларды шақырып, әр ел өзінің садақ ату өнерін көрсетіп, жарыс өткізетін ойындар жоспарланып отыр», - дейді Ким Хён Су.

Айта кетейік, кеше Дәстүрлі садақ атудан Пута нысанасын көздеуде қазақстандық спортшылар бір алтын, екі қола медаль жеңіп алды. 

Бүгін Қалқан нысанасын көздеуде қазақстандық, мажарстандық, үндістандық, ресейлік және қырғызстандық спортшылар финалға шықты. 

Жалпы командалық жарыстар 12 қыркүйек күні өтеді.