Мачадоның баспасөз қызметі оның Венесуэланың солтүстік-батысындағы Лара штатында жексенбілік шіркеу қызметіне қатысып жатқан суреттерін жариялады. Фотосуреттерде оппозиция жетекшісін жақтаушылары қоршап алып, оны құшақтап, қолын қысып тұр.
Мачадоның саяси одақтасы, қазір Испанияда тұратын бұрынғы президенттікке кандидат Эдмундо Гонсалес Мачадоның оралғанын растады.
— Біздің көшбасшымыз, құрметті Мария Коринаның Венесуэла жерінде екенін хабарлап отырғаныма қуаныштымын. Бүгін венесуэлалықтар үшін өте маңызды күн. Онымен бірге біздің егемен дауысымыз осы процесті басқару және бағыттау үшін оралады! - деп мәлімдеді Гонсалес.
Ол жақын арада Венесуэлаға келіп, оның қатарына қосылуды жоспарлап отырғанын атап өтті.
Reuters агенттігінің хабарлауынша, Мачадоның отанына оралуы Америка Құрама Штаттары, Панама және Колумбия билігімен келісілген. Бұл туралы оның сапарының мән-жайымен таныс дереккөз агенттікке хабарлады.
Мачадо Панамадан Колумбияға жеке ұшақпен ұшып, жексенбі күні Венесуэла шекарасын құрлық арқылы кесіп өтті. Ұшу өткен аптаның соңында болғаны және оның сапары кезінде оны жеке америкалық қауіпсіздік агенттігі күзетіп тұрғаны хабарланған. Осы дереккөздің мәліметінше, Америка Құрама Штаттары Мачадоның оралуы туралы билікке хабарлап, оларға оның қауіпсіздігіне қауіп төндіретін кез келген әрекет жасамауды ескерткен.
Мачадоның Венесуэлаға оралу үшін жасаған бұған дейінгі бірнеше әрекеті сәтсіз аяқталды. Оның кеңесшілерінің бірі қыркүйек айында Мачадо соңғы бірнеше аптада Венесуэлаға жеті рет оралуға әрекет жасағанын, бірақ қабылданбағанын мәлімдеді.
Еске сала кетейік, Нобель сыйлығының лауреаты Мачадо өткен қарашада Венесуэладан қайықпен жасырын түрде қашып кеткен.
АҚШ президенті Дональд Трамп Венесуэла оппозициясының жетекшісі Мария Мачадомен кездесуді жоспарлап отырғанын мәлімдеген еді.