ОРАЛ. KAZINFORM — Орал қаласы әкімі аппараты бірыңғай мемлекеттік-құқықтық бөлімінің басшысы қызметін атқаратын Әлихан Мыңжасаровтың қызмет бабын пайдаланып, некеде тұратын әйелі Альмира Қарасаеваға пәтер алып бергені белгілі болды.
БҚО әкімінің баспасөз қызметінен мәлім еткендей, бұл заңбұзушылықты өңір басшысы құрған жұмыс тобы қызметтік тексеру барысында биылғы 28 маусымда анықтаған.
«Жұмыс тобының қорытындысы лауазымды қызметкердің іс-әрекетіне тиісті құқықтық баға беру үшін Орал қаласы прокуратурасына жолданды. Сонымен қатар қазіргі кезде облыс әкімінің тапсырмасына сәйкес Орал қаласы әкімдігі мемлекеттік тұрғын үй қорынан пәтер берудің заңдылығын тексеру үшін осындай деректерді анықтау және оған жол бермеу мақсатында жұмыс тобын құрды», -деп хабарлады ведомстводан.
Айта кетейік, Сыбайлас жемқорлыққа қарсы іс-қимыл туралы заңның 15-бабына сәйкес жауапты мемлекеттік лауазымды атқаратын адамдарға, мемлекеттік функцияларды орындауға уәкілеттік берілген адамдарға және соған теңестірілген адамдарға, лауазымды адамдарға, егер мүдделер қақтығысы орын алған болса, лауазымдық міндеттерін жүзеге асыруға тыйым салынады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).