Бүгін Орал қаласынан Астанаға қатынайтын Air Astana ұшағы ұшпай қалды, деп хабарлайды Kazinform.
Жолаушылардың сөзіне қарағанда, ұшақ жергілікті сағат 16.40-та ұшуы керек еді.
«Төрт сағат ұшақтың ішінде отырдық. Әуелі техникалық ақаулық деді. Одан кейін әуежай жолағын мұз бен қардан тазалау үрдісі деп айтты. Ақыры сағат 20.40 шамасында автобусқа отырғызып, қайтадан әуежайға кіргізді. Басқа ұшаққа отырғызуы мүмкін екенін жеткізді», - деді Салтанат есімді жолаушы.
«Орал халықаралық әуежайы» ЖШС баспасөз қызметі оқиғаны растап, Air Astana ұшағы техникалық себептерге байланысты ұшу-қону жолағынан екінше рет қайтып келгенін, бүгін ұшпайтынын хабарлады.
Еске сала кетейік, бұдан бұрын ауа райының қолайсыздығынан Оралға келетін рейстер кешігіп жатқанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).