Орал қаласында жаңа жыл қарсаңында 14 сәби өмір есігін ашты, деп хабарлайды Kazinform.
БҚО Денсаулық сақтау басқармасынан түскен мәліметке қарағанда, соның 8-і 31 желтоқсанда сағат 00.00-ге дейін қалалық көпбейінді ауруханада, алтауы облыстық перинаталдық орталықта дүниеге келді.
Перинаталдық орталықтағы 6 сәбидің төртеуі – қыз, екеуі – ұл.
Қалалық көпбейінді аурухана директорының орынбасары Есет Ералиннің айтуынша, осындағы перзентханада 8 шақалақ шыр етіп, жерге түссе, соның алтауы – ұл, екеуі – қыз.
Есет Ғабитұлының сөзіне қарағанда, сонымен қатар бүгін сағат 11.00-ге дейін тағы 4 ана нәрестелі болса, соның екеуі – қыз, екеуі – ұл.
«Аналардың бәрі де отасыз, өздігінен босанды. Қазіргі кезде олардың және сәбилерінің жағдайы жақсы. Аурухананың босану бөлімшесінде 2 акушер дәрігер, 1 анестезиолог, 1 неонатолог, оған қоса 14 орта буын қызметкері жұмыс істейді. Мамандарымыз жаңа жыл түні де өз қызметін сапалы атқарып шықты», - деді Е.Ералин.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).