ОРАЛ. KAZINFORM – Орал қаласының солтүстік-шығыс шағынауданында жөндеу жұмыстарының жүргізілуіне байланысты 18 шілде күні газ беру уақытша тоқтатылады.
Орал қаласы әкімдігінен мәлім еткеніндей, «QAZAQGAZ AIMAQ» АҚ Батыс Қазақстан өндірістік филиалы аталған ауданда жоғары қысымды газ құбырында өндірістік жоспарлы жұмыстарды жүргізбекші.
«Газбен жабдықтау жұмыстары уақытша тоқтатылатын аумақтарға 7, 9, 10-шағынаудандар, Жұлдыз және Ескі әуежай, Орал-Желаев, Орал-Бузулук трассасы, Жұлдыз, Б.Жұмағалиев, Ш.Қоспанов, Б.Жұманиязов, В.Правдухин, Тәуелсіздік, Қазыбек би, Төле би көшелері, Әбілқайыр хан даңғылы кіреді. Жөндеу жұмыстары 18 шілде күні сағат 09.00-ден 18.30-ға дейін жүргізіледі. Қаланың аталмыш бөлігі 19-20 шілде күндері кезең-кезеңмен газбен қайта қамтамасыз етіледі. Қауіпсіздік шаралары үшін газ құралдарының крандарын ажырату қажет», - деп хабарлады ведомстводан.
Еске салсақ, бұған дейін Энергетика министрі Алмасадам Сәтқалиев елімізде газ бағасын кезең-кезеңінен көтеру жоспарланып отырғанын айтқан еді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).