Орал қаласы маңындағы орман өрті сөндірілу үстінде

ОРАЛ. ҚазАқпарат - Орал қаласындағы Учужный затон ауданында орман өртенуде.

БҚО ТЖ департаментінің баспасөз қызметінен түскен мәліметке қарағанда, қазіргі кезде өрт аумағы анықталу үстінде.

Өрт сөндіруге департаменттің жеке құрамынан 197 адам, 29 техника қатысуда. Сондай-ақ орман шаруашылығы мекемесінен 30 адам мен 1 техника, БҚО ішкі істер департаментінен 10 адам, 3 техника «тілсіз жауды» ауыздықтауға өз үлестерін қосуда.

Өрт аумағынан 104 адам шығарылды, 4 адам мен «Тополек» саяжай қоғамының 20 жеке автокөлігі құтқарылды.

Құрбандар мен зардап шеккендер жоқ.

Өрттің шығу себептері, шығын, кінәлі адамдар анықталуда. Айта кетейік, Батыс Қазақстанда бір аптадай уақыттан бері күн қайта ысып тұр.