ОРАЛ. ҚазАқпарат - Кеше Орал қаласы маңындағы 2-саяжай аумағында 40 га жерде құрғақ шөп өртенді, деп хабарлайды «ҚазАқпарат» тілшісі.
БҚО ТЖ департаментінің бас маманы, азаматтық қорғау капитаны Азамат Нұрпейісовтің айтуынша, соның салдарынан 14 электр бағанасына зақым келді. «Автомобилист» саяжай қоғамдастығында алаңы 36 шаршы метр үй мен сондағы жеке мүліктер және алаңы 30 шаршы метр иесіз үй өртеніп кетті.
«Тілсіз жауды» ауыздықтауға департаментке қарасты өрт сөндіру және апаттық-құтқару жұмыстары қызметінен 6 техника, 27 адам қатысты. Сондай-ақ орман және жануарлар дүниесін қорғау мекемесі мен «Жайық таза қала» ЖШС-дан қосымша күштер тартылды.
Қазіргі кезде өрттің шығу себептері, келтірілген шығын, кінәлі адамдар анықталу үстінде.
Соңғы күндері өңірде күннің күрт ысуы салдарынан өрт қаупі күшейе түсуде.
Айта кетейік, 2015-2016 жылдары Батыс Қазақстанда 59 орман өрті тіркеліп, соның кесірінен орман қорына 29,4 млн. астам теңге залал келді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).