ОРАЛ. ҚазАқпарат – ҚР Президент Әкімшілігінің және қалалық маслихат келісімімен, меритократия қағидаттарына сәйкес Миржан Мұнайдарұлы Сатқанов Орал қаласының әкімі болып тағайындалды, деп хабарлайды ҚазАқпарат тілшісі.
БҚО әкімінің баспасөз қызметі мәлім еткеніндей, Миржан Мұнайдарұлы 1977 жылы Батыс Қазақстан облысында дүниеге келген.
Білімі жоғары, Түркия Республикасы Докуз Ейлюл университетін қаржы мамандығы бойынша тәмамдаған.
Еңбек жолын 2000 жылы Орал қалалық қаржы бөлімінің жетекші маманы болып бастаған.
Әр жылдары БҚО кәсіпкерлікті қолдау және дамыту департаментінің бас маманы, бөлім басшысы және басшының орынбасары, БҚО кәсіпкерлік және индустриалдық-инновациялық даму басқармасы басшысының орынбасары, басқарма басшысы, БҚО жолаушылар көлігі және автомобиль жолдары басқармасының басшысы, БҚО әкімінің орынбасары болып қызмет атқарды.
Күні бүгінге дейін Бөрлі ауданының әкімі болып еңбек етті.
Еске сала кетейік, бұдан бұрын БҚО денсаулық сақтау басқармасына жаңа басшы тағайындалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).