Орал қаласында 1521 адам «Жұмыспен қамту - 2020» бағдарламасына қатысты
Қала әкімдігінен хабарлағанындай, аталмыш бағдарлама бойынша жыл бойы 1666 адам қоғамдық жұмысқа қабылданды (жоспар бойынша 1547 адам), оның 1103-і - әйел. 29 жасқа дейінгі жастар - 357 адам. Әлеуметтік орынға 451 жұмыссыз, оның 256-сы «Жұмыспен қамту - 2020» бағдарламасы бойынша орналасты.
Жастар тәжірибесімен барлығы 1078 жас маман қамтылса, оның 946-сы «Жұмыспен қамту - 2020» бағдарламасы бойынша.
Жұмыссыздардың еңбек нарығында бәсекеге қабілеттілігін арттыру үшін кәсіптік оқыту, қайта оқыту және біліктілігін арттыру жұмыстары жүргізіледі. Жыл басынан бері 33 мамандық бойынша қайта оқытуға 451 адам жіберілді.
Өткен жылы 8250 адам қатысқан бос жұмыс орындарының 15 жәрмеңкесі өткізілді. Оның ішінде 112 адам тұрақты жұмысқа, әлеуметтік жұмыс орындарына 3 адам орналасты, 65 адам кәсіптік оқытуға жолдама алды және 6320 адамға жұмыспен қамту туралы заңнама бойынша кеңес берілді.
«Жұмыспен қамту - 2020» бағдарламасын жүзеге асыру барысында 300 әлеуметтік жұмыс орнын ұйымдастыру үшін 57 млн. теңге және 600 кәсіптік оқу орнын бітірушілерді жастар тәжірибесі бойынша жұмысқа орналастыру үшін республикалық бюджеттен 111 млн. теңге бөлінді.
«Жұмыспен қамту - 2020» бағдарламасына қатысушылар саны 1521 адамды құрады.
Әлеуметтік жұмыс орындарын ұйымдастыруға 45 ұйым тапсырыс беріп, 67 шарт жасалды. Бұл мақсатқа республикалық бюджеттен 20 млн.теңге бөлінді.
Жастар тәжірибесін өткізу үшін қаладағы 140 ұйыммен 363 шарт жасалды. Нәтижесінде 946 түлек жастар тәжірибесіне жолданды.
Оқытуға, қайта оқытуға және біліктілігін арттыруға 518 адам жолданды, олардың 206-сы оқуын аяқтады. Соның 201-і тұрақты жұмысқа орналасты.
2012 жылы зейнеткерлер мен мүгедектердің зейнетақысы өсуіне байланысты мемлекеттен көмек алушы отбасылар саны 2011 жылмен салыстырғанда азайып отыр.