ОРАЛ. ҚазАқпарат – Батыс Қазақстан облысында 16 сәуірден бастап карантиндік шектеу шаралары күшейтіледі. Бұл туралы брифингте БҚО-ның бас мемлекеттік санитары Мұхамғали Арыспаев мәлім етті, деп хабарлайды ҚазАқпарат тілшісі.
Оның айтуынша, бүгіннен бастап БҚО бас мемлекеттік санитарлық дәрігерінің қаулысына өзгерістер енгізіледі.
Атап айтқанда, ертеңнен бастап Орал қаласында барлық бағыттағы автобустар қатынасы тоқтатылады.
«Сонымен қатар облыстағы барлық банк және пошта бөлімшелері, азық-түлік базарлары жабылады», деді М.Арыспаев.
М.Арыспаев облыста коронавируспен ауырғандар саны 18-ге жеткенін, тек соңғы тәулікте алты адамның тіркелгенін айтып, сондықтан індетке қарсы шаралардың күшейтіліп отырғанын атап өтті.
Еске сала кетейік, БҚО-да соңғы тіркелген науқастың ауруды қайдан жұқтырғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).