ОРАЛ. ҚазАқпарат – Орал қаласында құбыр жарылып, 350- ге жуық абонент сусыз қалды, деп хабарлайды ҚазАқпарат тілшісі.
«Батыс су арнасы» ЖШС мәлім еткеніндей, 30 маусым күні сағат 20.00-де Ш.Айталиев пен Алматы көшелерінің қиылысында су құбыры жарылды.
Құдықтар мен жеке тұрғын үйлердің аулаларынан су сорғызылды.
«Қазіргі таңда 350-ге жуық абонент сусыз қалып отыр. Тұрғындарға су жеткізу жұмыстары ұйымдастырылды. Шамамен 1 шілде күні сағат 22.00-ге дейін жүргізілетін өндеу жұмыстарына апаттық техника, экскаватор, вакуумдық машина, МТЗ-82 базасында сорғы тартылған», деп хабарлады кәсіпорынның баспасөз қызметі.
Батыс Қазақстанда күн қатты ысып кеткендіктен, сусыз қалу тұрғындарға оңай тиіп отырған жоқ.
Еске сала кетейік, бұдан бұрын Батыс Қазақстанда күшті желдің ғимараттардың шатырын жұлып әкеткенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).