ОРАЛ. ҚазАқпарат – Оралда Басқақ тоғайы аумағындағы өрт сөндірілді, деп хабарлайды ҚазАқпарат тілшісі.
БҚО ТЖД баспасөз қызметінен мәлім еткеніндей, екі күнге ұласқан «тілсіз жау» 21 сәуір күні сағат 21:13-те толықтай ауыздықталды.
Орман аумағындағы құрғақ шөптің өртеніп жатқаны жөнінде 20 сәуір күні сағат 14:21-де хабар түскен еді. Кейін өрттің 70 гектар аумақты (55 гектары – құрғақ шөп, 15 гектары – орман екпелері) қамтығаны белгілі болды.
«Өртті сөндіруге БҚО ТЖД-ден, Орал орман және жануарлар дүниесін қорғау коммуналдық мемлекеттік мекемесінен барлығы 92 адам (18 техника, 1 қайық, 4 мотопомпа) жұмылдырылды. Зардап шеккендер жоқ. Қазіргі кезде жағдай тұрақты. Қауіп сейілді», - деп хабарлады ведомстводан.
Еске сала кетейік, бұдан бұрын Орал қаласында құрғақ шөптің өртенуіне байланысты жедел штаб құрылғанын жазған болатынбыз.
Сондай-ақ, Оралда тоғай аумағындағы өрт 70 гектарды қамтыды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).