Орал қаласында су кестемен беріледі

ОРАЛ. ҚазАқпарат - Орал қаласында су кестемен беріледі, деп хабарлайды ҚазАқпарат тілшісі.

Орал қаласы әкімінің баспасөз қызметінен түскен мәліметке қарағанда, шаһардағы кәріз коллекторларының еріген суға толуына байланысты 10 наурыз күні сағат 20.00-ден бастап қала бойынша су беру уақытша тоқтатылды.

«Сонымен қатар тұрғынжайларды сарқынды және еріген су басу қаупі туындады. Соған орай қалада су беру кестемен беріледі: 07.00-ден 09.00-ге дейін, 12.00 - 14.00 және 18.00 - 20.00. Жағдай қалыпқа келген кезде су беру штаттық режимде жүргізілетін болады», деп хабарлады ведомстводан.

Еске сала кетейік, бұдан бұрын су тасқынына байланысты Батыс Қазақстан облысында 138 елді мекен ерекше бақылауға алынғанын жазған болатынбыз.

Сондай-ақ БҚО-да 2 мыңнан аса тұрғын үйі ауыз сусыз қалған ауылда төтенше жағдай жарияланды.